ප්‍රමිතිගත නොවූ හුණු කිසිදු පවිත්‍රකරණ ක්‍රියාවලියක් සඳහා යොදාගත්තේ නැහැ - ජල සම්පාදන මණ්ඩලය
Friday, 07 February 2025 - 10:13 pm
ජාතික ජල සම්පාදන හා ජලාපවහන මණ්ඩලය විසින් ජල පිරිපහදුව සඳහා භාවිත කරනු ලබන රසායන ද්‍රව්‍යවල ගුණාත්මක භාවය සම්බන්ධයෙන් දැනුම්දීමක් සිදුකර තිබෙනවා.
ඒ අනුව පිළිස්සු හුණු ටොන් 1500 ක් මිලදී ගැනීම සඳහා ජාතික පුවත්පත් හරහා විවෘත ලංසු කැඳවූ බවත් එහිදී කොන්ත්‍රාත්කරු විසින් පළමුව හුණු ටොන් 380 ක් මෙරටට ගෙන්වා මණ්ඩලයේ ගබඩා වෙත භාරදුන් බවයි එම මණ්ඩලය සඳහන් කරන්නේ.
එම තොගයෙන් අහඹු සාම්පල් රැගෙන පරීක්ෂා කිරීමේදි එම හුණුවල ඇති ක්‍රෝමියම් ප්‍රමාණය පිරිවිතරයේ සඳහන් 10mg/kh ප්‍රමාණය ඉක්මවා ඇති බව සොයා ගත් බවයි එම මණ්ඩලය පෙන්වා දෙන්නේ.
ඒ අනුව මෙම තොගය පිරිවිතරයන්ට අනුකූල නොවන බැවින් මණ්ඩලයේ තොගවලට නොගෙන වෙනම ගබඩා කළ බවත් මෙම තොගය කිසිදු පවිත්‍රකරණ ක්‍රියාවලියක් සඳහා යොදා නොගත් බවයි ජාතික ජල සම්පාදන හා ජලාපවහන මණ්ඩලය වැඩිදුරටත් ප්‍රකාශ කළේ.
