Local

දරුවන් සිඟමනේ යෙදවීම අද සිට සපුරා තහනම් !

Tuesday, 01 July 2025 - 5:51 pm

වයස අවුරුදු 16ට අඩු ළමයින් සිඟමනේ යෙදවීම, වෙළෙඳාම් කටයුතුවල යෙදවීම සහ වයස අවුරුදු 16 – 18 අතර ළමුන් ගෘහ සේවය ඇතුළු අනතුරුදායක රැකියාවල යෙදවීම අද (01) සිට සපුරා තහනම් කිරීමට හැකි වන පරිදි දැනට පවතින නීතිමය විධිවිධාන දැඩි කිරීමට පසුගියදා කැබිනට් අනුමැතිය හිමිවිය.

ඇතැම් ළමුන් විවිධ හේතූන් මත කුමන හෝ රැකියාවක් කිරීමට පෙළඹී ඇති අතර තමාගේ මව හෝ පියා සමග එසේ නොමැති නම් මිනිස් වෙළෙඳාමේ ගොදුරක් ලෙස “වීදි දරුවෙකු” බවට පත් වී දෙමාපියන් නොවන අයෙකු සමඟ පොදු ස්ථාන ආශ්‍රිතව සිඟමනේ යෙදෙන බව සහ නොයෙක් දේ අලෙවි කරන බවද හඳුනාගෙන තිබේ.

ඉහත සදහන් කළ ආකාරයේ අනතුරුදායක රැකියාව වල ළමුන් යෙදවීමට එරෙහිව අදාළ බලධාරින් මඟින් නීති දැඩි ලෙස ක්‍රියාත්මක කිරීමටත් ඒ පිළිබඳව පුළුල් ප්‍රචාරණ වැඩපිළිවෙළක් මඟින් මහජනතාව දැනුම්වත් කිරීමටත් මෙම නීතිය අනුව හැකි වනු ඇත.