ඉම්රාන්ගේ වසර 14ක සිර දඬුවම අත්හිටුවයි
Tuesday, 02 April 2024 - 8:06 am
අගමැතිවරයා ලෙස කටයුතු කරද්දී විදෙස් රාජ්‍ය නායකයන්ගෙන් සහ තානාපතිවරුන්ගෙන් ලැබුණු මිල අධික තෑගි භාණ්ඩ භාණ්ඩාගාරයට ලබාදීම වෙනුවට සිය හිතවතුන් අතර බෙදාදීමෙන් සහ අලෙවි කිරීමෙන් පාකිස්තාන රුපියල් මිලියන 140ක මුදලක් අයුතු ලෙස උපයා ගැනීමේ චෝදනාවට වරදකරු වී වසර 14ක සිර දඬුවම් විඳිමින් සිටින පාකිස්තානයේ හිටපු අගමැති ඉම්රාන් ඛාන්ගේ සිර දඬුවම අත්හිටුවීමට ඉස්ලාමාබාද් නුවර මහාධිකරණය ඊයේ නියම කළ බව විදෙස් මාධ්‍ය වාර්තා කළේය. ඔහු සමඟ එක්ව එම තෑගි භාණ්ඩ අලෙවි කළ බවට චෝදනා එල්ල වී සිටි ඔහුගේ බිරිය බුෂ්රා බීබීට ද වසර 14ක සිර දඬුවම් නියම කර තිබූ අතර, දෙදෙනාගේ සිර දඬුවම රාමලාන් උපවාස සමය අවසන් වීමෙන් පසු තීරණයක් ගන්නා තුරු අත්හිටුවන බව ඉස්ලාමාබාද් මහාධිකරණය නියෝග කර තිබේ.
ඉම්රාන් ඛාන් වසර 2018 සිට 2022 දක්වා කාලය ඇතුළත පාකිස්තානයේ අගමැතිවරයා ලෙස කටයුතු කළ අතර, එම කාලය තුළ ඔහුට සහ බිරියට විදෙස් රාජ්‍ය නායකයන්ගෙන් සහ තානාපතිවරුන්ගෙන් ත්‍යාග 108ක් ලැබී ඇතැයි ද වාර්තා වේ. ඉම්රාන්ට සහ බිරියට සිර දඬුවමට අමතරව පාකිස්තාන රුපියල් මිලියන 787ක දඩයක් ද නියම කර ඇති අතර, දෙදෙනාටම වසර 10ක කාලයකට රජයේ කිසිදු තනතුරක් දැරීම ද තහනම් කිරීමට අධිකරණය මීට පෙර පියවර ගෙන තිබිණි.
