ප්‍රතිදේහ එන්නත් වංචාව ගැන වෛද්‍ය සමන් රත්නායකගෙන් හෙට පාපොච්චාරණයක්
Sunday, 03 March 2024 - 4:34 pm
ප්‍රශ්නගත ප්‍රතිදේහ එන්නත් වංචාව සම්බන්ධයෙන් මහෙස්ත්‍රාත්වරිය ඉදිරියේ පාපොච්චාරණයකට තමන් සුදානම් බව සෞඛ්‍ය අමාත්‍යාංශයේ අතිරේක ලේකම් වෛද්‍ය සමන් රත්නායක අධිකරණය හමුවේ ප්‍රකාශ කර තිබෙනවා.
අපරාධ පරීක්ෂණ දෙපාර්තමේන්තුවේ අත්අඩංගුවට පත්වීමෙන් පසු මාලිගාකන්ද මහෙස්ත්‍රාත් අධිකරණයට ඉදිරිපත් කළ අවස්ථාවේදී ඔහු මේ බව සඳහන් කර ඇති බවයි වාර්තා වෙන්නේ.
ඒ අනුව දීර්ඝ ලෙස කරුණු විභාග කිරීමෙන් අනතුරුව සැකකරු සම්බන්ධයෙන් පෙනී සිටි නීතිඥ කාංචන රත්වත්තේ සුවිශේෂි කරුණු කිහිපයක් දක්වමින් සිට සේවාදායකයා ඇප මත මුදා හරින්නැයි ඉල්ලා තිබෙනවා.
මහේස්ත්‍රාත්වරිය විසින් එම ඇප ඉල්ලීම ප්‍රතික්ෂේප කර සැකකරු දින 14ක කාලයක් සඳහා රක්ෂිත බන්ධනාගාර ගත කිරීමට සූදානම්වනවාත් සමඟම විත්තිකූඩුවේ සිටි සැකකරු තමන්ට අධිකරණය ඉදිරියේ ප්රකාශයක් සිදුකළ යුතු බව සඳහන් කර තිබෙනවා.
අධිකරණය ඉදිරියේ ප්රකාශයක් සිදුකිරීමට අවැසි නම් ඊට නෛතික ප්‍රතිපාදන තිබෙන අතර මහෙස්ත්‍රාත්වරිය ඉදිරියේ ප්‍රකාශ කළ යුතු දේ රහසිගතව සිදු කිරීමට හැකි බවත් එසේ සිදුකරන ප්‍රකාශය අධිකරණය ඉදිරියේ සැකකරුට එරෙහිව භාවිතා වීමට හැකිි බවද, එම ප්‍රකාශය මත ඔහුව තවදුරටත් සැකකරුවෙකු ලෙස සැලකීම හෝ නඩුවේ සාක්ෂිකරුවෙකු කරගැනීම සිදු වන බැවින් හොඳින් සිිතා ඒ පිළිබඳ තීරණයක් ගන්නා ලෙස මහෙස්ත්‍රාත්වරිය සැකකරුට ප්‍රතිචාර දක්වමින් සඳහන් කර තිබෙනවා.
අනතුරුව සැකකාර සමන් රත්නායක තමන් ඉදිරියේ ප්රකාශයක් කිරීමට සූදානම් බවත් හෙට (04) දිනයේ ඒ සඳහා අවස්ථාව ලබාදෙන බවත්, එතෙක් සැකකරුව සෙසු සැකකරුවන්ගෙන් වෙන්ව තබන ලෙසද මහෙස්ත්‍රාත්වරිය නියෝග කර තිබෙනවා.
