පාකිස්ථාන ගුවන් හමුදා කඳවුරු තුනකට ඉන්දීය මිසයිල ප්‍රහාර
Saturday, 10 May 2025 - 5:35 pm
ඉන්දියාව තම හමුදා ගුවන් කඳවුරු තුනක් ඉලක්ක කර මිසයිල ප්‍රහාර එල්ල කළ බවට පාකිස්තානය චෝදනා කර සිටින අතර, ඉන්දියාවට එරෙහිව පළිගැනීමේ ක්‍රියාමාර්ග ගන්නා බව පාකිස්තාන හමුදාව ප්‍රකාශ කරනවා.
කෙසේ නමුත්, ඉන්දීය ගුවන් කඳවුරු ඉලක්ක කර ගැනීම සඳහා පාකිස්තානය ද අධිවේගී මිසයිල භාවිතා කළ බවයි ඉන්දීය හමුදා චෝදනා කර සිටින්නේ.
අද (10) අලුයම සිට කාශ්මීරයේ ඉන්දියාව සහ පාකිස්තානය අතර දේශසීමා රේඛාව දිගේ ස්ථාන කිහිපයකින් පිපිරීම් පිළිබඳ වාර්තා වූ බව විදෙස් මාධ්‍ය වාර්තා කරනවා.
ඉන්දීය පාලනය යටතේ පවතින කාශ්මීරයේ ශ්‍රීනගර් සහ ජම්මු යන නගරවල පිපිරීම් ශබ්ද ඇසුණු බවත්, කාශ්මීරයේ උදම්පූර් සහ පන්ජාබයේ පතන්කොට් යන ප්‍රදේශවලින් ද පිපිරීම් හඬ ඇසුණු බවත් ප්‍රාදේශීය මාධ්‍ය වාර්තා කර ඇති බවයි සඳහන් වන්නේ.එසේම, ඉන්දීය පාලනය යටතේ පවතින කාශ්මීරයේ රාජෝරි නගරයේ අතිරේක නියෝජ්‍ය කොමසාරිස් රාජ් කුමාර් තාපා පාකිස්තානයේ ෂෙල් වෙඩි ප්‍රහාරවලින් මිය ගිය බව එහි මහ ඇමති ඕමාර් අබ්දුල්ලා පවසා සිටියා.
අද රාජෝරි නගරය ඉලක්ක කර ගනිමින් පකිස්ථානු ෂෙල් වෙඩි ප්‍රහාරයක් එල්ල වූ බවත්, ඉන්දීය පරිපාලනය යටතේ පවතින කාශ්මීරයේ ජම්මු නගරයේ අවම වශයෙන් තවත් සිවිල් වැසියන් දෙදෙනෙකු මිය ගොස් ඇති බවත් විදෙස් මාධ්‍ය වාර්තා කර සිටිනවා.
මේ අතර, ඇඩම්පූර් හි ඉන්දියානු S-400 පද්ධතිය විනාශ කිරීම, සූරත් සහ සිර්සා හි ගුවන් තොටුපළ විනාශ කිරීම, නාග්‍රෝටා හි බ්‍රහ්මෝස් අවකාශය, ඩෙරන්ගාරි හි කාලතුවක්කු තුවක්කු ස්ථාන සහ චන්දිගාර් පතොරම් ගබඩාව සහ අනෙකුත් ඉන්දීය හමුදා මර්මස්ථානවලට දැඩි හානියක් සිදු කළේ යැයි සමාජ මාධ්‍යවල ප්‍රචාරය වන කාරණා අසත්‍ය බව ඉන්දියාව පවසා තිබුණා.
පාකිස්තානය විසින් පතුරුවන මෙම අසත්‍ය ප්‍රකාශ ඉන්දියාව තරයේ ප්‍රතික්ෂේප කරන බවයි ඉන්දීය බලධාරීන් සඳහන් කරන්නේ
.webp)
.webp)
.webp)
.webp)
