Local

බොරු වියදම් වාර්තා දුන්නොත් ජනපති අපේක්ෂකයන්ට වැඩ වරදී

Thursday, 05 September 2024 - 10:14 am

අපේක්ෂකයකුට ජනාධිපතිවරණයේ දී ඡන්දදායකයකු වෙනුවෙන් වියදම් කළ හැකි මුදලට වඩා වැඩියෙන් වියදම් කර ඇති බවට අධිකරණ නඩු විභාගයකින් පැහැදිලි තොරතුරු අනාවරණය වුවහොත් අදාළ ඡන්ද අපේක්ෂකයාගේ ප්‍රජා අයිතිය වසර තුනකට අහෝසි කෙරෙන බව මැතිවරණ කොමිෂන් සභාව පවසයි.
එලෙස ප්‍රජා අයිතිය අහෝසි කෙරුණු අවස්ථා ඉතිහාසයේ පවතින බව මැතිවරණ කොමසාරිස් ජනරාල් සමන් ශ්‍රී රත්නායක මහතා පැවසීය. එමෙන්ම ඔහුගේ ධූරය අහිමි කිරීමට ද ප්‍රතිපාදන ඇති බව හෙතෙම සඳහන් කළේය. මේ අතර ජනාධිපති අපේක්ෂකයන්ගේ වියදම් විස්තරය මැතිවරණයෙන් පසු පුවත්පත් දැන්වීම්වල සහ වෙබ් අඩවිවල ප්‍රදර්ශනය කරන බව මැතිවරණ කොමිෂන් සභාව පවසයි. වියදම් විස්තර පරස්පර හෝ වැරදි තොරතුරු ලබාදී ඇත්නම් ජනතාවට ඕනෑම අවස්ථාවක ඊට විරුද්ධව පොලිසියේ පැමිණිල්ලක් ඉදිරිපත් කර අධිකරණ ක්‍රියාමාර්ගයකට අවතීර්ණවීමට නීතියෙන් අවසර හිමිවන බවද කොමසාරිස් ජනරාල්වරයා කීය.අපේක්ෂකයන්ගේ වියදම් විස්තරය ඡන්දයෙන් පසු දින 21 ක් ඇතුළත මැතිවරණ කොමිෂන් සභාවට බාරදිය යුතුවේ.