කැනඩාවේ රෝහලකදි මාරු වූ දරු දෙදෙනා වසර 70කට පසු සැබෑ ඥාතීන් අතරට
Sunday, 24 March 2024 - 8:06 am
කැනඩාවේ මැනිටොබා ප්‍රාන්ත රෝහලක එකම දිනයේ උපත ලැබූ දරුවන් දෙදෙනකු වැරදීමකින් එකිනෙකාගේ මවුවරුන් අතර මාරු වීමේ පුවතක් වසර 70කට පසු අනාවරණය වී ඇතැයි විදෙස් මාධ්‍ය වාර්තා කළේය. මේ වන විට මහලු වියේ පසුවන මේ පුද්ගලයන් දෙදෙනා දශක ගණනාවක් සිය ජීව විද්‍යාත්මක මාපියන්ගෙන් තොරව හැදී වැඩීමත්, පරම්පරා ගණනාවක් යනතුරු සැබෑ උරුමයන් අහිමි වීමත් හේතුවෙන් දැඩි කම්පනයට පත්ව සිටි බවත් විදෙස් මාධ්‍ය වැඩිදුරටත් වාර්තා කළේය. ඉන් එක් පුද්ගලයකු වන රිචඩ් බෝවේස් වැරදි වාසගමක් සහිතව කැනඩාවේ මිශ්‍ර ආදි වාසී උරුමයක් සහිතව බ්‍රිතාන්‍ය කොලොම්බියා ප්‍රාන්තයේ සිචෙල්ට් වෙරළබඩ නගරයේ හැදී වැඩී ඇති අතර, අනික් පුද්ගලයා වන එඩී ඇම්බ්‍රොස් යුරෝපීය හා යුක්රේන සම්භවයකට උරුමකම් කියන ආකාරයෙන් ඊට කිලෝමීටර් 2,400ක් දුරින් පිහිටි මැනිටොබා ප්‍රාන්තයේ විනිපෙග් නුවර හැදී වැඩී ඇතැයි විදෙස් මාධ්‍ය සඳහන් කළේය. මීට වසර කිහිපයකට පෙර එම පුද්ගලයන් විසින් අහඹු ලෙස සිදු කළ ඩීඑන්ඒ පරීක්ෂණයකින් මේ බව අනාවරණය වී ඇති අතර, එය දෙපාර්ශ්වයේහිම දැඩි ආන්දෝලනයකට තුඩු දුන් සිදුවීමක් බවට පත්වූ බව ද වාර්තා වේ.
මේ පිළිබඳ මැනිටොබා ප්‍රාන්ත අගමැති වබ් කිනිව් ඔවුන් ප්‍රාන්ත පාර්ලිමේන්තුවට කැඳවා පෞද්ගලිකව කනගාටුව ප්‍රකාශ කර ඇතැයි ද විදෙස් මාධ්‍ය වාර්තා කළේය.
ඔවුනොවුන්ගේ උරුමයන් වෙතින් ඈත්ව එකිනෙකට වෙනස් පවුල් සම්භවයක සාමාජිකයන් ලෙස මුළු ජීවිත කාලයම ගෙවා දැමීමට සිදුවීම ඔවුන්ගේ පවුල්වල දැඩි කම්පනයට හේතු වී ඇති අතර, පසුගියදා නීතිඥවරු මාර්ගයෙන් මැනිටොබා ප්‍රාන්ත රජය දැනුම්වත් කිරීමෙන් පසු ඔවුන්ට ප්‍රාන්ත අගමැතිවරයා මුණගැසීමට අවස්ථාව ලැබී තිබූ බව ද වාර්තා වේ.
මේ වන විට එඩී ඇම්බ්‍රොස් සිය ජීව විද්‍යාත්මක ඥාතීන් අතරට ගොස් සිටින බවත්, රිචඩ් බෝවේස් ද සිය ජීව විද්‍යාත්මක පවුල සමඟ එක්වීමට සැලසුම් කර ඇති බවත් වැඩිදුරටත් වාර්තා වේ. රෝහල් කාර්ය මණ්ඩලයේ අතපසුවීමෙන් සිදු වූ බරපතළ වරද වෙනුවෙන් වන්දි ලබාගැනීම සඳහා දෙදෙනාම නීති මාර්ගයෙන් කටයුතු කරමින් සිටින බව ද වාර්තා වේ.
.webp)
.webp)
.webp)
.webp)
