Local

අපේ ප්‍රතිපත්තිය පාසල් 10,000ට කෝටිපතියෝ 10,000ක් හොයන එක නෙවෙයි - කෞෂල්‍යා ආරියරත්න

Wednesday, 12 March 2025 - 6:37 pm

ජාතික ජන බලවේග ආණ්ඩුව යටතේ නිදහස් අධ්‍යාපනය රාජ්‍ය වගකීමෙන් ගිලිහීමට ඉඩ ලබා නොදෙන බව පාර්ලිමේන්තු මන්ත්‍රී ආචාර්ය කෞෂල්‍යා ආරියරත්න පවසනවා.

රජයේ ප්‍රතිපත්තිය වන්නේ පාසල් 10,000ට කෝටිපතියන් 10,000ක් සෙවීම නොවන බවත්, රජය අත්හැරිය නොහැකි මූලික වගකීමක් අධ්‍යාපනය සම්බන්ධයෙන් දරණ බවත් ඇය ප්‍රකාශ කර සිටියා.

පෞද්ගලික අංශයට රජය සමග සහයෝගයෙන් වැඩ කළ හැකි බවයි අයවැය කාරක සභා අවස්ථාවේ විවාදයට එක්වෙමින් මන්ත්‍රීවරිය සඳහන් කළේ.

අධ්‍යාපනය තුළට තාක්ෂණය ගෙන එන පවසමින් නොයෙකුත් කොමිස් ගැනීම් හා දූෂණ වංචා සිදුකර ඇති බවට අනාවරණය වී ඇති බවත්, ඒවා සෙවීමට කාලයක් ගතවන බවත් ඇය පෙන්වා දුන්නා.

රුපියල් බිලියන 1.5ක් පමණ වැය කර සුහුරු පුවරු (Smart Board) 1000 ක් ගෙන්වා ඇති නමුත්, ඒවා ලබාදෙන ආකාරය ගැන සැලැස්මක් නොමැතිවීම නිසා ගබඩාවල තබා ඇති බවයි පාර්ලිමේන්තු මන්ත්‍රී ආචාර්ය කෞෂල්‍යා ආරියරත්න වැඩිදුරටත් ප්‍රකාශ කර සිටියේ.