පානීය ජල බෝතල් වැඩි මිලට අලෙවි කළ සුපිරි වෙළෙඳසැලකට මිලියන 2ක දඩයක්
Friday, 09 May 2025 - 10:11 am(1).webp)
පානීය ජල බෝතල් වැඩි මිලට අලෙවි කළ, යුනියන් පෙදෙසෙහි පිහිටි සුපිරි වෙළෙඳසැල් ජාලයකට අයත් ශාඛාවකට රුපියල් මිලියන 2ක දඩයක් නියම කර ඇති බව පාරිභෝගික කටයුතු පිළිබඳ අධිකාරිය පවසනවා.
ඉකුත් අප්‍රේල් 01 වැනිදා සිට දේශීයව නිෂ්පාදනය කරනු ලබන පානීය ජල බෝතල් සඳහා උපරිම සිල්ලර මිලක් නියම කර ඇති අතර, එය උල්ලංඝනය කිරීම හේතුවෙන් මෙම දඩය පනවා ඇති බවයි එම අධිකාරිය සඳහන් කළේ.
මේ වනවිට ලීටර් 1 ජල බෝතලයකට රු. 100ක් ලෙස උපරිම සිල්ලර මිලක් නියම කර තිබෙනවා.
අදාළ සුපිරි වෙළෙඳසැල් ශාඛාවේ ලීටරයේ පානීය ජල බෝතලයක් රුපියල් 130ක මුදලකට අලෙවි කිරීම සම්බන්ධව පාරිභෝගික කටයුතු පිළිබඳ අධිකාරිය ඉකුත් අප්‍රේල් 23 වැනිදා වැටලීමක් සිදුකර ඇති අතර, අදාළ සමාගමට එරෙහිව පවරන ලද නඩුව ඊයේ (08) අලුත්කඩේ අංක 5 ප්‍රධාන මහේස්ත්‍රාත් අධිකරණයේ දී කැඳවූ අවස්ථාවේදී එම සුපිරි වෙළෙඳසැල වරද පිළිගෙන තිබෙනවා.
මේ අතර පානීය ජල බෝතල් වැඩි මිලට අලෙවි කළ තවත් වෙළෙඳසැල් පහකට ද රුපියල් ලක්ෂය බැගින්, ලක්ෂ 05ක දඩ මුදලක් අධිකරණය මගින් නියම කර ඇති බවයි වැඩිදුරටත් සඳහන් වෙන්න‍ේ.
.webp)
