දින අටක පර්යේෂණයට ගිය අමෙරිකානු ගගනගාමීන් දෙදෙනා යානයේ දෝෂයකින් අභ්‍යවකාශ නැවතුම්පොළේ සිරවෙලා -යළි පෘථිවියට එන්නේ 2025 පෙබරවාරියේ බව නාසා ආයතනය කියයි
Monday, 26 August 2024 - 8:57 am
පර්යේෂණ චාරිකාවක් සඳහා දින අටකට අභ්‍යවකාශ නැවතුම් මධ්‍යස්ථානය වෙත ගිය නාසා ආයතනයේ අමෙරිකානු ගගනගාමීන් දෙදෙනාට ලබන වසරේ පෙබරවාරි මාසය දක්වා එහි රැඳී සිටීමට සිදුවී ඇතැයි විදෙස් මාධ්‍ය වාර්තා කළේය. ඊට හේතු වී ඇත්තේ ඔවුන් ගමන් ගත් ස්ටාර්ලයිනර් යානගේ හීලියම් කාන්දුවීමක් ඇතුළු කාර්මික දෝෂ කිහිපයක් හට ගැනීම බවත්, එම යානය ගගනගාමීන් දෙදෙනා රහිතව යළි පෘථිවියට පැමිණෙනු ඇති බවත් නාසා ආයතනය ප්‍රකාශ කර තිබේ. පසුගිය ජූනි මස 5 වැනිදා නාසා ආයතනයේ ‘බොයිං ස්ටාර්ලයිනර්‘ යානයෙන් පෘථීවි කක්ෂයේ පිහිටි අභ්‍යවකාශ මධ්‍යස්ථානය වෙත ගිය 58 හැවිරිදි විශ්‍රාමික නාවික හමුදා නිලධාරිනියක වන සුනිතා විලියම්ස් සහ 61 හැවිරිදි නාවික හමුදා කපිතාන්වරයකු වන බච් විල්මෝර් මේ වන විටත් මාස 2ක් පුරා එහි සිර වී සිටින අතර, ඔවුන්ට නැවත පෘථිවියට පැමිණීමට සිදුවන්නේ නාසා ආයතනය ලෝක ධනපතියා වන එලෝන් මස්ක්ගෙන් කුලියට ගත් ස්පේස් එක්ස් යානයෙන් බවත්, ඒ සඳහා ලබන වසරේ පෙබරවාරිය දක්වා බලා සිටීමට සිදුවනු ඇති බවත් මාධ්‍ය හමුවක් පවත්වමින් නාසා ආයතනය ප්‍රකාශ කර තිබේ. එම කාලය ඇතුළත ඔවුන් දෙදෙනා ලබන මස අභ්‍යවකාශ මධ්‍යස්ථානයට පැමිණීමට නියමිත ස්පේස් එක්ස් යානයේ සාමාජිකයන් සමඟ පූර්ණ කාලීන සාමාජිකයන් ලෙස කටයුතු කරනු ඇතැයි ද, පෘථිවි කක්ෂයේ විද්‍යාගාරයේ පරිපාලන කටයුතුවලට සහ නැවතුම් මධ්‍යස්ථානයෙන් පිටත අභ්‍යවකාශයේ ඇවිදීමේ කටයුතුවලට ඔවුන්ට සහාය වනු ඇතැයි ද වාර්තා වේ.
අභ්‍යවකාශ නැවතුම් මධ්‍යස්ථානයේ මේ වන විටත් රුසියානු ගගනගාමින් 7 දෙනකුගේ නවාතැනක් බවට පත්වී ඇති අතර, පර්යේෂණයක් සඳහා පසුගිය අප්‍රේල් 5 වැනිදා එක්ස්පෙඩිෂන් 71 යානයෙන් එහි ගිය එම ගගනගාමින් යළි පෘථිවියට පැමිණීමට නියමිතව ඇත්තේ ලබන මාසයේදී බව වාර්තා වේ. අභ්‍යවකාශ මධ්‍යස්ථානයේ සිර වී සිටින සිය ගගනගාමීන් දෙදෙනාට අවශ්‍ය ආහාර හා ඉන්ධන ඇතුළු අනෙකුත් අත්‍යවශ්‍ය භාණ්ඩ මේ මස මුල් භාගයේදී නාසා ආයතනය විසින් භාණ්ඩ ප්‍රවාහන යානයකින් අභ්‍යවකාශ නැවතුම් මධ්‍යස්ථානය වෙත යවා ඇතැයි ද විදෙස් මාධ්‍ය සඳහන් කළේය. මීට අමතරව රුසියාව ද ආහාර ඇතුළු ටොන් 3ක භාණ්ඩ තොගයක් යැවීමට පියවර ගෙන තිබිණි.
.webp)
.webp)
.webp)
