Local

අධිවේගී පිවිසුම ජලයෙන් යටවේ.. මාර්ග රැසක් ජලයෙන් යටවෙයි..

Friday, 11 October 2024 - 11:20 am

පවතින අධික වැසි සහිත කාලගුණ තත්වය සමඟ ඇතිවූ ජලගැලීම් තත්වයක් හේතුවෙන් දක්ෂිණ අධිවේගී මාර්ගයේ වැලිපැන්න පිවිසුම වසා දමා ඇතිබව දක්ෂිණ අධිවේගී මාර්ග තොරතුරු මධ්‍යස්ථානය පවසයි.

මේ අතර ඊයේ (10) රාත්‍රියේ සිට ඇදහැලෙන මහ වැසි හේතුවෙන් ගාල්ල දිස්ත්‍රික්කයේ නාගොඩ ,බද්දේගම ,වැලිවිටිය දිවිතුර ,බෝපේ පෝද්දල ,නියාගම ,යක්කලමුල්ල ,ඇල්පිටිය ඇතුළු තදාසන්න ප්‍රදේශ වල අතුරු මාර්ග සහ පහත් බිම් රැසක් මේවන විට ජලයෙන් යටවෙමින් පවතියි.

ඒ හේතුවෙන් එම මාර්ග වල ගමනා ගමන කටයුතු සඳහා බාදා මතුව තිබේ.

ගිංගඟ ,බෙන්තර ගඟ සහ පොල් අතු මෝදර ගංගාවල අතුරු ඇල මාර්ග පිටාර ගැලීම හේතුවෙන් බොහොමයක් මාර්ග ජලයෙන් යටවෙමින් තිබේ.

මේ අතර කොළඹ කඩුවෙල වැලිහිද බෝධිය අසල ඇලට පුද්ගලයකු වැටී අතුරුදන්ව ඇතිබව ආපදා කළමනාකරණ මධ්‍යස්ථානය පවසයි.

අතුරුදන් වූ පුද්ගලයා සොයා නවගමුව පොලිසිය පරීක්ෂණ ආරම්භ කර තිබේ.