International

ජපානයේ ඉෂිකාවා කලාපයේ දරුණු ජලගැලීම්වලින් 06ක් මරුට

Tuesday, 24 September 2024 - 9:40 am

ජපානයේ ඉෂිකාවා කලාපයට ඇද හැළුණු ධාරාණිපාත වර්ෂාව හේතුවෙන් හටගත් ජලගැලීම් හා නායයෑම්වලින් පුද්ගලයන් 06 දෙනකු මියගොස් ඇති අතර තවත් 10 දෙනකු අතුරුදන්ව ඇති බව විදෙස් මාධ්‍ය පවසයි. ඉකුත් සෙනසුරාදා සිට ඊයේ (23දා) දහවල් දක්වා නොනවත්වා ඇදහැලී ඇති අධික වැසි හේතුවෙන් දරුනු ජලගැලීම් හා නායයෑම් නිසා මෙම තත්ත්වය උද්ගතව ඇති බව ජපන් බලධාරීහු පවසති.

මෙම ස්වභාවික විපත්වලින් දැඩි හානි සිදුව ඇත්තේ ඉකුත් ජනවාරි මස 01 වැනිදා දරුනු භූමිකම්පාවක් හේතුවෙන් බැට කෑ වජීමා හා සුසු නගරවලට බව වාර්තා වී තිබේ. අදාළ නගර දෙකට ඉකුත් සෙනසුරාදා සිට ඊයේ දක්වා කාලය තුළ වසරක කාලයක් ඇදහැළෙන වර්ෂාපතනය ඇදහැලීම හේතුවෙන් මෙවැනි තත්ත්වයක් උද්ගතවී තිබේ. ඉෂිකාවා කලාපයට ඇද හැලී ඇති වැසි සමග ගංගාවන් විශාල සංඛ්‍යාවක් පිටාර ගලා මහා මාර්ග ජලයෙන් යටවීම හේතුවෙන් කලාපයේ සිටින ප්‍රජාවන් සිය ගණනක් සෙසු ප්‍රදේශවලින් හුදකලාවී ඇති බව බලධාරීහු පවසති.