ඉන්දුනීසියානු ජනපතිගෙන් දැවැන්ත කැබිනට්ටුවක්
Tuesday, 22 October 2024 - 10:25 am
ඉන්දුනීසියාවේ අටවැනි ජනාධිපතිවරයා වශයෙන් පෙරේදා (20දා) දිවුරුම් දී ඇති එරට හිටපු යුද හමුදා ජෙනරාල්වරයකු වූ ප්‍රබොවෝ සුබියන්ටෝ දශක ගණනාවකට පසු එරට දක්නට ලැබුණු විශාලතම කැබිනට් මණ්ඩලය පත් කර ඇති බව විදෙස් මාධ්‍ය පවසයි. මේ අනුව නව ඉන්දුනීසියානු ජනාධිපති සුබියන්ටෝ විසින් පත් කර ඇති කැබිනට් මණ්ඩලයට ඇමැතිවරු 48 දෙනකු අයත් වන අතර ඔවුන් සඳහා පත් කර ඇති නියෝජ්‍ය ඇමැතිවරුන්ගේ සංඛ්‍යාව 58කි. හිටපු ඉන්දුනීසියානු ජනාධිපති ‘ජොකොවි’ යන අන්වර්ථ නාමයෙන් හැඳින්වෙන ජෝකෝ විඩෝඩො පත් කර තිබූ කැබිනට් මණ්ඩලයට ඇමැතිවරුන් 34 දෙනකු අයත් වූ අතර ඔවුනට සහය වීම සඳහා පත් කර සිටි නියෝජ්‍ය ඇමැතිවරුන්ගේ සංඛ්‍යාව 30ක් විය.
හැත්තෑ තුන් වැනි වියෙහි පසු වන නව ඉන්දුනීසියානු ජනාධිපති සුබියන්ටෝ දශක ගණනාවක්ම මානව හිමිකම් උල්ලංගනය කිරීමේ චෝදනාවලට ලක්ව සිටි අතර ඉකුත් පෙබරවාරි මස පැවති ඉන්දුනීසියානු ජනාධිපතිවරණයේදී සිය ප්‍රතිවාදීන් දෙදෙනාම පරාජය කරමින් සියයට 58 කට වැඩි ඡන්ද ප්‍රතිශතයක් ගනිමින් ජයග්‍රහණය හිමිකරගෙන තිබිණි. නව ජනාධිපතිවරයා විසින් සිය උප ජනාධිපතිවරයා වශයෙන් පත් කරගෙන ඇත්තේ හිටපු ඉන්දුනීසියානු ජනාධිපති ජොකොවි ගේ වැඩිමල් පුත් ජිබ්‍රන් රකාබනින් රකා වන අතර සිය ආර්ථික කටයුතු ඇමැතිවරයා වශයෙන් නම් කර ඇත්තේද හිටපු ජනාධිපතිවරයාගේ ආර්ථික කටයුතු ඇමැතිනිය වූ ශ්‍රී මුල්‍යානි ඉන්ද්‍රවතී වීම විශේෂත්වයකි. අග්නිදිග ආසියාවේ විශාලතම ආර්ථිකය පවතින ඉන්දුනීසියාවෙන් දූෂණය තුරන් කරන බවට ප්‍රතිඥා දී ඇති සුබියන්ටෝ ජනාධිපතිවරයා රට ආහාරවලින් හා බලශක්තියෙන් ස්වයංපෝෂිත කරන බව ධුරයේ දිවුරුම් දීමෙන් පසු ප්‍රකාශ කර තිබේ.
