බංග්ලාදේශ අර්බුදය ගැන අමෙරිකාවේ අවධානය
Thursday, 15 August 2024 - 6:58 pm
අමෙරිකාව බංග්ලාදේශයේ තත්ත්වය සම්බන්ධයෙන් ඉන්දියාව සහ කලාපයේ අනෙකුත් රටවල් සමග සම්බන්ධ වී සිටින අතර, එහි ප්‍රචණ්ඩත්වය අවසන් කිරීමට උත්සාහ කරන බව රාජ්‍ය දෙපාර්තමේන්තුව පවසනවා.ඒ අනුව, එක්සත් ජනපද රාජ්‍ය දෙපාර්තමේන්තුවේ නියෝජ්‍ය ප්‍රකාශක වේදන්ත් පටෙල් (Vedant Patel) සිය දෛනික ප්‍රවෘත්ති සාකච්ඡාවේදී ඊයේ (14) පවසා තිබුණේ, 'පෞද්ගලික රාජ්‍ය තාන්ත්‍රික සාකච්ඡාවලට නොපැමිණෙන නමුත් බංග්ලාදේශයේ ප්‍රචණ්ඩත්වය අවසන් කිරීම, වගවීම සහ නීතියේ ආධිපත්‍යයට ගරු කිරීම සඳහා අපි දිගටම උත්සාහ කරනවා,' යනුවෙන්.
ෂෙයික් හසීනා රජය බිඳවැටීමෙන් පසු බංග්ලාදේශයේ උද්ගතව ඇති තත්ත්වය පිළිබඳව ඉන්දියාව සහ අමෙරිකාව අතර, ඇති වූ සන්නිවේදනය පිළිබඳ මාධ්‍යවේදියෙකු නැගූ ප්‍රශ්නයකට පිළිතුරු දෙමිනුයි ඔහු මේ බව සඳහන් කර තිබුණේ.
'බංග්ලාදේශයේ මෑත සිදුවීම් සාකච්ඡා කිරීම සඳහා අපි අපගේ ඉන්දියානු හවුල්කරුවන් මෙන්ම කලාපයේ අනෙකුත් රටවල් සමඟ සම්බන්ධ වී සිටිමු,' යනුවෙන් පැවසූ එක්සත් ජනපද රාජ්‍ය දෙපාර්තමේන්තුවේ නියෝජ්‍ය ප්‍රකාශකයා වැඩිදුරටත් සඳහන් කර තිබුණේ, බංග්ලාදේශයේ ප්‍රධාන උපදේශක මුහම්මද් යුනුස්ගේ ප්‍රකාශය සාදරයෙන් පිළිගන්නා බවයි.
තව ද සන්සුන්ව වී මෑත කාලීන ප්‍රචණ්ඩත්වය අවසන් කරන ලෙස ද බංග්ලාදේශයේ නව රජයෙන් අමෙරිකාව ඉල්ලා සිටින බව සඳහන් කළ ඔහු වැඩිදුරටත් පැවසුවේ, “සුළුතර ප්‍රජාවන්ගේ සාමාජිකයින්ගේ ආරක්ෂාව සහ ආරක්ෂාව යථා තත්ත්වයට පත් කිරීම කෙරෙහි නව රජයේ අවධානය යොමු කිරීම අපි සාදරයෙන් පිළිගනිමු,” යනුවෙන්.
