කමලා හැරිස් අමාරුවේ දාන්න ට්‍රම්ප් බැදපු අල තීරු විකුණයි
Tuesday, 22 October 2024 - 10:27 am
ඇමරිකානු ජනාධිපති අපේක්ෂකයකු මෙන්ම හිටපු ඇමරිකානු ජනාධිපතිවරයකු ද වන ඩොනල්ඩ් ට්‍රම්ප් සිය ප්‍රතිවාදී ජනාධිපති අපේක්ෂිකාව වන උප ජනාධිපතිනි කමලා හැරිස්ව කලබලයට හා අපහසුවට පත් කිරීමේ අරමුණින් පෙරේදා (20දා) පිලඩෙල්පියා නගරයේ පිහිටි කෙටි ආහාර අලෙවි කරන අවන්හලකට ගොස් ‘ෆ්‍රෙන්ච් ෆ්‍රයිස්’ යනුවෙන් හැඳින්වෙන බදින ලද අල තීරු පාරිභෝගිකයන්ට පිළිගන්වා ඇති බව විදෙස් මාධ්‍ය පවසයි. උප ජනාධිපතිනි කමලා හැරිස් තරුණ වියේදී කෙටි ආහාර අලෙවි කරන අවන්හල් ජාලයක් වන මැක්ඩොනල්ඩ්ස් අවන්හලක සේවය කළ බව පවසා තිබීම හේතුවෙන් ඇයව උපහාසයට පත් කිරීමේ අරමුණින් මෙම කෙටි ආහාර පිළිගැන්වීම ට්‍රම්ප්ගේ ජනාධිපතිවරණ ව්‍යාපාරය විසින් සංවිධානය කර තිබේ.
පිලඩෙල්පියා නගරයේ ෆෙස්ටවිල් ප්‍රදේශයේ පිහිටා ඇති හිටපු ජනාධිපති ට්‍රම්ප් විසින් අදාළ ආහාර පිළිගැන්වීම සිදු කර ඇති මැක්ඩොනල්ඩ්ස් අවන්හල සාමාන්‍යයෙන් ඉරිදා දිනවල වසා තැබෙන අතර ට්‍රම්ප්ගේ ජනාධිපතිවරණ ව්‍යාපාරය සඳහා අදාළ ආහාර පිළිගැන්වීම සිදු කිරීමට ඉකුත් ඉරිදා දින විවෘත කර ඇති බව වාර්තා වේ. මෙහිදී එම මැක්ඩොනල්ඩ්ස් අවන්හලේ පාලනාධිකාරිය මෙන්ම ට්‍රම්ප්ගේ ජනාධිපතිවරණ ව්‍යාපාරය විසින් එදින ‘ෆ්‍රෙන්ච් ෆ්‍රයිස්’ පිළිගැන්වීම සඳහා පාරිභෝගිකයන් පිරිසක් තෝරාගෙන ඔවුන්ව දැඩි ලෙස පරීක්ෂා කිරීමෙන් පසු අවන්හලට ඇතුළත් කරගෙන ඇති බව ඇමරිකානු මාධ්‍ය විසින් වාර්තා කර තිබේ. අවන්හලට ඇතුළත් කරගෙන ඇති පාරිභෝගිකයන් පිරිස පැමිණි වාහනද දැඩි ලෙස පරික්ෂා කර ඇති බව වාර්තා වී තිබේ. මෙහිදී හිටපු ජනපති ට්‍රම්ප් විසින් උප ජනාධිපතිනි හැරිස් ට යැයි පවසමින් ෆ්‍රෙන්ච් ෆ්‍රයිස් පැකට්ටු සඳහා ගම්මිරිස් කුඩු ඉස ප්‍රදර්ශනය කර ඇති අතර ‘උප ජනාධිපතිනි හැරිස් ෆ්‍රෙන්ච් ෆ්‍රයිස් තැනූ බවත් එහිදී දැඩි උණුසුමක් පැවති ආකාරයත් පවසා තිබුණා. එය අසීරු කාර්යයක්, ඇය කිසි විටකත් කියන අයුරින් මැක්ඩොනල්ඩ්ස් අවන්හලක සේවය කර නැහැ’ යැයි ඔහු පවසා තිබේ. මේ අතර සිය ප්‍රතිවාදියා වන ට්‍රම්ප්ගේ පුද්ගලික ප්‍රහාරයන් සම්බන්ධයෙන් අදහස් දක්වා ඇති උප ජනාධිපතිනි කමලා හැරිස් ට්‍රම්ප් එම ප්‍රහාර හරහා ඇමරිකානු ජනාධිපති ධුරය හෑල්ලු කර ඇතැයි පවසා තිබේ.
.webp)
