Local

උසස් පෙළ සිසුන්ට විභාග දෙපාර්තමේන්තුවෙන් කළ දැනුම්දීම

Wednesday, 30 October 2024 - 7:35 pm

2024 උසස් පෙළ විභාගයට අදාළ කාලසටහන විභාග දෙපාර්තමේන්තුවේ නිල වෙඩ් අඩවියෙන් පමණක් බාගත කරගන්නා ලෙස විභාග කොමසාරිස් ජනරාල් අමිත් ජයසුන්දර මහතා උසස් පෙළ විභාග අපේක්ෂකයින්ට දැනුම් දී තිබෙනවා.

අද පැවති මාධ්‍ය හමුවකට එක්වෙමින් විභාග කොමසාරිස්වරයා ප්‍රකාශ කළේ 2024 උසස් පෙළ නොවැම්බර් 25 සිට දෙසැම්බර් 20 වනදා දක්වා පැවැත්වීමට සියලු කටයුතු සුදානම් කර ඇති බවයි.

සෑම විටම විභාග දෙපාර්තමේන්තුව විසින් සිදුකරනු ලබන නිල නිවේදන පමණක් විශ්වාස කරන ලෙසත් සමාජ මාධ්‍ය ඔස්සේ සිදුකරන ප්‍රචාරයන්ට නොරැවටෙන ලෙසත් විභාග කොමසාරිස්වරයා සිසුන්ගෙන් එහිදී ඉල්ලා සිටියා.

මෙවර උසස් පෙළ සඳහා විෂයන් 64ක් යටතේ අයදුම්කරුවන් 333,185 දෙනෙකු පෙනී සිටීමට නියමිතව තිබෙනවා.

ඉන් 253,390 දෙනෙකු පාසල අයදුම්කරුවන් වන අතර පෞද්ගලික අයදුම්කරුවන් 79,795ක් මෙවර උසස් පෙළ විභාගය සඳහා අයදුම් කර ඇති බව සඳහන්.

විභාග මධ්‍යස්ථාන 2,317ක දී මෙවර උසස් පෙළ විභාගය පැවැත්වීමට නියමිත අතර උතුරු පළාතේ ඩෙල්ෆ් සහ නයනතිව් දූපත්වලද විභාග මධ්‍යස්ථාන දෙකක් ස්ථාපිත කර ඇති බවයි විභාග කොමසාරිස් ජනරාල්වරයා පැවසුවේ.