සිසිලි මුහුදේ ගිලුණු බයේසියන් යාත්‍රාවේ රක්ෂණ ආවරණය ඩොලර් මිලියන 150ක්
Saturday, 31 August 2024 - 8:38 am
බ්‍රිතාන්‍ය කෝටිපති ව්‍යාපාරික මයික් ලින්ච් ඇතුළු පුද්ගලයන් 7 දෙනකුට මරු කැඳවමින් ඉතාලියේ සිසිලි දූපත ආසන්නයේදී පසුගියදා ටොනේඩෝ කුණාටුවකට හසුවී මුහුදුබත් වූ ‘බයේසියන්’ සුඛෝපභෝගී සංචාරක යාත්‍රාවේ රක්ෂණ මුදල අමෙරිකානු ඩොලර් මිලියන 150ක ඉක්මවනු ඇතැයි යාත්‍රා නිෂ්පාදන ක්ෂේත්‍රයේ විශේෂඥවරු අනාවැකි පළ කර ඇතැයි වාර්තා වේ. බ්‍රිතාන්‍ය ධජය සහිතව ගමන් කළ බයේසියන් සුපිරි යාත්‍රාව සුළි කුණාටුවට හසුවී මුහුදුබත් වූයේ උතුරු සිසිලියේ නැංගුරම් ලා තිබියදීය. යාත්‍රාව මුහුදේ ගිලී අතුරුදන් වූයේ මිනිත්තු කිහිපයක් ඇතුළතදීය. යාත්‍රාවේ රක්ෂණය ඇතුළුව පාරිසරික හානිය, තුවාල හා මරණ ඇතුළුව තුන්වැනි පාර්ශ්වයේ වගකීම් හිමිකම් කර ඇති බැවින් රක්ෂණ මුදල එවැනි විශාල අගයක් ගනු ඇතැයි වැඩිදුරටත් වාර්තා වේ.
බයේසියන් යාත්‍රාව අනතුරට පත්වීමට එම යාත්‍රාවේ කපිතාන්වරයා ඇතුළු කාර්ය මණ්ඩලයේ නොසැලකිලිමත්භාවය බලපෑ බවට චෝදනා එල්ල වූවද, රක්ෂණ ආවරණයට එමඟින් බලපෑම් සිදු නොවන බවත් විදෙස් මාධ්‍ය සඳහන් කළේය. මධ්‍යධරණී මුහුදේ අඩි 160ක් ගැඹුරු සාගර පතුලේ තැන්පත්වූ යාත්‍රාවේ සුන්බුන් අතර සිරවුණු සියලු මළසිරුරු සමඟ මුහුදුබත් වූ සුඛෝපභෝගී යාත්‍රාව ගොඩගැනීමේ සැලසුමක් නැති බවත් වාර්තා වේ.
