Local

මන්නාරම සුළං විදුලි බලාගාරය ඉදිකිරීමට එරෙහි පෙත්සම් ඉල්ලා අස් කර ගනියි

Tuesday, 18 March 2025 - 2:25 pm

මන්නාරම වෙඩිතලතිව් ප්‍රදේශයේ ඉන්දියාවේ අදානි සමාගම සමඟ සුළං විදුලි බලාගාරයක් ඉදිකිරීම සඳහා ඇති කර ගෙන තිබූ තීරණය බලරහිත කරන ලෙස ඉල්ලා ගොනුකර තිබූ මූලික අයිතිවාසිකම් පෙත්සම් අද (18) ශ්‍රේෂ්ඨාධිකරණය වෙතින් ඉල්ලා අස් කරගෙන තිබෙනවා.

ඒ අනුව අදාළ ව්‍යාපෘතිය ඉවත් කර ගන්නා බවට ඉන්දියාවේ අදානි සමාගම විසින් මෙරට ආයෝජන මණ්ඩලයේ සභාපතිවරයාට ලිඛිතව දැනුම් දී ඇති බවයි මෝසමක් ඉදිරිපත් කරමින් නිතිපතිවරයා ශ්‍රේෂ්ඨාධිකරණයට දැනුම් දී ඇත්තේ.

එම දැනුම් දීමෙන් පසු පෙත්සම්කරුවන් විසින් අදාළ මූලික අයිතිවාසිකම් පෙත්සම් ඉල්ලා අස්කර ගෙන තිබෙනවා.

පරිසර යුක්ති කේන්ද්‍රය ඇතුළු පාර්ශව කිහිපයක් විසින් මෙම පෙත්සම ඉදිරිපත් කර තිබුණා.