දුම්රිය ඇතුළු ප්‍රවාහනයට සම්බන්ධ ආයතන ලාභ උපයන ආයතන බවට පත් කිරීමට කමිටුවක්
Saturday, 24 August 2024 - 7:25 pm
පුද්ගලික බස් රථ හිමියන්ගේ සංගමය ඇතුළු ප්‍රවාහන සංගම් 10ක් මෙවර ජනාධිපතිවරණයේ දී ජනාධිපති රනිල් වික්‍රමසිංහ මහතාගේ ජයග්‍රහණය තහවුරු කිරීම වෙනුවෙන් එක් වෙයි.
පුද්ගලික බස් රථ හිමියන්ගේ සංගමයේ සභාපති ගැමුණු විජේරත්න මහතා ඇතුළු සංගම් ප්‍රධානින් හා නියෝජිතයන් කොළඹ මල් පාරේ පිහිටි ජනාධිපති රනිල් වික්‍රමසිංහ මහතාගේ දේශපාලන කාර්යාලයේ දී ඊයේ (23) ජනාධිපතිවරයා හමු වී ඉදිරි ජනාධිපතිවරණයේ දී ජනාධිපතිවරයා වෙත සිය පුර්ණ සහාය පළ කරන බව ප්‍රකාශ කළහ.
නැවත ඉන්ධන පෝලිම් තමන්ට අවශ්‍ය නොවන බව මෙහිදී පෙන්වා දුන් ප්‍රවාහන සංගම් නියෝජිත පිරිස ඉන්ධන හිඟය හමුවේ තම ප්‍රවාහන කටයුතු පවත්වාගත නොහැකිව මුහුණදුන් අසීරුතා අමතක නොමැති බවද සඳහන් කළහ.
රටේ කඩා වැටි තිබු ආර්ථිකය ගොඩගැනීමට වසර දෙකක් වැනි කෙටි කාලයක් තුළ ජනාධිපතිවරයා ක්‍රියාත්මක කළ වැඩපිළිවෙළ අගය කළ ප්‍රවාහන සංගම් නියෝජිතයන් රට ඉදිරියට ගෙන යමින් ජනතාවට ජිවත්විය හැකි පරිසරයක් ගොඩනඟා දිය හැකි එකම නායකයා ජනාධිපති රනිල් වික්‍රමසිංහ මහතා බවද පෙන්වා දුන්නේය.
ලංකා පෞද්ගලික බස් හිමියන්ගේ සංගමය, අන්තර් පළාත් බස් හිමියන්ගේ සංගමය, පොදුජන පෙරමුණ බස් සංගමය, බහලුම් ප්‍රවාහන සංගමය, කාර්යාල ප්‍රවාහන සංගමය, සමස්ත ලංකා රියදුරු වෘත්තීය සමිතිය, සමස්ත ලංකා ත්‍රිරෝද රථ රියදුරන්ගේ හා හිමිකරුවන්ගේ සංගමය, සමස්ත ලංකා පාසල් බස් රථ සංගමය, දුම්රිය ස්ථානාධිපතිවරුන්ගේ සංගමය, ජාතික ටැක්සි ත්‍රිරෝද රථ වෘත්තිකයන්ගේ එකමුතුව යන සංගම්වල ප්‍රධානීන් සහ නියෝජිතයන් පිරිසක් මෙලෙස ජනාධිපතිවරයා හමු වී සහාය පළ කළහ.
උතුරු හා නැගෙනහිර පළාත් නියෝජනය කරමින් ප්‍රවාහන සංගම් නියෝජිතයන් පිරිසක්ද මෙම හමුවට එක්ව සිටි අතර ක්ෂේත්‍රය තුළ ඔවුන් මුහුණ දී සිටින ගැටළු කිහිපයක් ද ජනාධිපතිවරයා වෙත ඉදිරිපත් කෙරිණි. ඒ පිළිබඳ සොයා බලා කඩිනම් විසඳුම් ලබාදීමට කටයුතු කරන බව ජනාධිපති රනිල් වික්‍රමසිංහ මහතා පැවසීය.
එසේම රටේ ආර්ථිකය දියුණු කිරිමේදී ප්‍රවාහන ක්ෂේත්‍රයට විශාල වගකීමක් පැවරෙන බව පෙන්වා දුන් ජනාධිපතිවරයා මෙරට ප්‍රවාහන ක්ෂේත්‍රයේ උන්නතිය වෙනුවෙන් ඒකාබද්ධ අභ්‍යන්තර ප්‍රවාහන ක්‍රමයක් ඇති කිරීමට රජයේ අවධානය යොමුව ඇති බවත්, එහිදී ප්‍රවාහන ක්ෂේත්‍රයට ආදළ දැනට පවතින ආයතන පද්ධතියේ පරිවර්තනයක් සිදු කිරීමට කටයුතු කරන බවත් ප්‍රකාශ කළේය. එම කටයුතු වෙනුවෙන් ජනාධිපතිවරණයෙන් පසු නව කමිටුවක් පත් කිරීමට කටයුතු කරන බවද ජනාධිපති රනිල් වික්‍රමසිංහ මහතා පැවසීය.
පුද්ගලික බස් රථ හිමියන්ගේ සංගමයේ සභාපති ගැමුණු විජේරත්න මහතා විසින් රචනා කරන ලද “භූ දේශපාලනයේ ව්‍යාකූලත්වය හා ජීවයේ පැවැත්ම, ශ්‍රී ලංකාවේ ජාතික ආරක්ෂාව සහ ජාත්‍යන්තර ත්‍රස්ත වපසරිය – බල රංගනය” නැමති කෘතිය ද මෙහිදී ජනාධිපති රනිල් වික්‍රමසිංහ මහතා වෙත පිළිගැන්විණි.
.webp)
