Sports

අවුරුදු 20න් පහළ ලෝක මලල ක්‍රීඩා ශූරතා තරගාවලිය

Saturday, 31 August 2024 - 8:27 am

මෙම දිනවල පේරු රාජ්‍යයේ ලිමා අගනුවර පැවැත්වෙන වයස අවුරුදු 20න් පහළ ලෝක මලල ක්‍රීඩා ශූරතා තරගාවලියේ මීටර් 100 කාන්තා ඉසව්වේ රන් පදක්කම ජැමෙයිකාවේ අලනා රීඩ් විසින්ද එම පිරිමි ඉසව්වේ රන් පදක්කම දකුණු අප්‍රිකාවේ බයන්ඩා වලාසා විසින්ද දිනාගෙන තිබේ. පෙරේදා (28දා) පැවති මෙම ඉසව්වලදී මීටර් 100 කාන්තා ඉසව්වේ අවසන් මහා තරගය තත්ත්පර 11.17කින් නිම කරමින් රන් පදක්කම ජැමෙයිකාවේ අලනා රීඩ් විසින් දිනා ගත් අතර මීටර් 100 පිරිමි ඉසව්වේ අවසන් තරගය තත්ත්පර 10.19කින් නිම කරමින් රන් පදක්කම දකුණු අප්‍රිකාවේ බයන්ඩා වලාසා විසින් ද දිනාගෙන තිබේ.

තත්ත්පර 11.27කින් කාන්තා මීටර් 100 ඉසව්ව නිම කළ බ්‍රිටිෂ් වර්ජින් දූපත්වල අඩීජා හෝජ් විසින් රිදී පදක්කමද තත්ත්පර 11.27කින් එම ඉසව්ව නිම කළ බාබඩෝස් දූපතේ කිෂව්නා නයිල්ස් ලෝකඩ පදක්කමද හිමි කරගෙන තිබේ. මේ අතර පිරිමි මීටර් 100 ඉසව්වේ රිදී පදක්කම තත්ත්පර 10.22කින් තරගය නිම කළ තායිලන්තයේ පුරිපොල් බුන්සන් විසින්ද ලෝකඩ පදක්කම එම ඉසව්ව තත්ත්පර 10.26කින් නිම කළ දකුණු අප්‍රිකාවේ බ්‍රෑඩ්ලි නිකොආනා විසින්ද දිනාගෙන තිබේ.